Ƴan Boko Haram sun haɗa kai da ɓarayin dajin jahar Neja domin cigaba da ta’addanci

Kungiyar Jama’atu Ahlussunnah Lidda’awati Wal Jihad da aka fi sani da Boko Haram bangaren Abubakar Shekau, sun tabbatar da alakarsu da ‘yan bindigan da ke jihar Niger a cikin wani sabon bidiyo da suka fitar.

Bidiyon mai tsawon minti shida da dakika biyar an gano mayakan kungiyar boko haram suna magana da harshen Hausa da Turanci da kuma Kanuri kamar yadda kafar yaɗa labarai ta HumAngle ta ruwaito.

Mayakin da ya yi magana da farko sanye da takunkumi a fuskarsa ya yi magana ne cikin harshen hausa kamar haka;

“Gaisuwa ta musamman daga dan uwanku mai jihadi da ke Tafkin Chadi. Gaisuwa ga shugaban mu Abu Muhammad Ibn Muhammad Abubakar Asshakawy.

Wannan sako ne zuwa ga masu jihadi a ko ina, musamman wadanda ke kusa da mu. Muna muku gaisuwa irin ta addinin musulunci.


“Sakona na biyu kuma zuwa ga dukkan wadanda ba su yi imani ba a dukkan sassan duniya. Ku tuba, kuna da sauran lokaci. Idan kuma ba ku tuba ba, ku jira ku ga abinda zai faru da ku nan ba da dadewa ba,” in ji shi.

Wasu kuma sunyi magana da harsunan turanci da Kanuri inda suka maimaita sako mai kama da na farkon.

Wanda ya yi magana da turanci ya ce, “Sako na ga kafurai. Ya ku kafurai, kuna da damar ku tuba ga Allah Subhanahu Wa Ta’ala kafin ya hukunta ku da hannunsa.

“Cikin kankanin lokaci, za ku ga abinda zai faru a kasuwannin ku. Za kuma ku ga abinda zai faru a ofisoshin ku.

“Nan ba da dadewa ba za ku ga abinda zai faru a gidajenku. Duk inda ku ke, za ku ga abinda zai faru da ku.”

Wani dan ta’adda ya yi alkawarin gano duk dan leken asirin da Rundunar Sojin Najeriya ta tura cikinsu domin ya rika kawo mata rahoto.

A baya, HumAngle ta ruwaito cewa kungiyoyin ta’adda na yankin Arewa maso yamma suna shirin hadin gwiwa tare da sauran kungiyoyin ta’adda a Arewa maso tsakiya da Arewa maso yamma.

A bidiyon da aka fitar yau, Talata, wani mayaki da aka nuna ya ce shi dan asalin jihar Niger ne kuma yana aika gaisuwa ga yan uwansa da ke Sambisa, Tafkin Chadi da Zamfara.

Ya ce, “Muna aika gaisuwa da yan uwanmu da ke Sambisa, Tafkin Chadi da Zamfara.”

Leave a Reply

Your email address will not be published. Required fields are marked *